(1845-1895) Charada 3
El tiu de Fermin el Caldereru
que tuvo les vexigues por Febreru
foi descalzu á Manila, vieno ricu
y á tou 'l que ye probe pon focicu.
Como tien á fartar Napoleones; (sic)
falai de fabes prietes, lleche ó quesu
ye rompei á pataes un lluviesu.
A fuerza d' esmorgar tantes tayaes
saliói prima y segunda en 'es quixáes
y en mi primera y tercia encibielláu
espatuxa y tirita el desdicháu.
Por curase lo fai.....y cosa clara;
¿sinon en prima y tercia como entrara?
Razón, Blas el Furón mialma tenia
cuando dixo q' un méricu decia
"Pa 'l home q' avezau esta 'l centenu
un pancín de la Pola ye un venenu;
la barriga del vientre de la panza
carez si e' nes comides tien mudanza".
Si el tiu de Fermin esto supiera
en vez de paxarucos y cevera
que non faen coción, bones plataes
de fariñes comiera y non tayaes.
Un llugarin ye 'l todu d' esti cuentu,
guapin, atopadizu, en su contentu,
el vieyu y el rapaz la vida pasa
si un gaxu de boroña tien en casa.
T. Cuesta